Hichkichahat...

    

    Hichkichahat life ko kitni interesting banati hain. Jab aap kissise se milte hain, pehli baar, aap kai choti choti cheezon mein hichkichate hain. Agar maine aisa kahaa aur ussey bura lag jaayega toh? Kya mujhe yeh karna chahiye? Woh mere bare mein kya sochegi wagera wagera. Kuch logon ke saath rishta sirf hichkichahat par bana hota hain. Na hum unhein mitaane ki koshish karte hain, aur na who ussey kam karne ki… Jaise ek badi si deewar ho do logon ke beech. Aur shaayad who rishta ussi deewar pe tika ho. Deewar na ho, toh shaayad who rishta bhi na ho.  Par kuch log hotein hain, jo bas chand mulaakaaton mein, ya kabhi kabhi chand ghanton mein, ya kuch baton se humaare is tarah kareeb aa jaate hain ki who hichkichahat jaise pigal si jaati hain. Kabhi kabaar to sirf ek joke, ya sirf ek touch hi kaafi hota hain uss deewar ko giraane ke liye. Aur achanak aisa lagta hain jaise hum ek-doosre ko kaafi arse se jaante hain… Shaayad yeh uss kshan se aata hain jab hum sochte hain ki hmmm.. yeh bilkul mere jaise hi hain to phir deewar ki zaroorat hi nahi hain. Kabhi aaine aur apne beech kisi deewar ko mehsoos kiya hai aapne?  Ya phir uss soch se ki yeh kaafi alag hain mujhse. Yeh apni jagah theek hain aur main apni jagah sahi. Na mujhe ussey badalni ki zaroorat hain na uske liye mujhe badalna padega. Hum dono baraabar hain, aur ek hi saath jee sakte hain…

    Jab Hichkichahat ki who deewar gir jaati hain. Toh uski kalpana bhi funny ho jaati hain. Phir jab hum milte hain toh aksar aisi baatein kartein hain ki, pata hain jab hum pehli baar mile they toh mujhe to laga tha tum kuch waise they, aur yeh maatra ek hansi ka topic ban jaata hain. Chahe jo bhi ho, hichkicahat ka hona, ya phir uss deewar ka ekdum se gir jaana, life ko kaafi interesting banaata hai. Nahi?  

Bhaade ki cycle...

    Un dino hum cycle bhaade pe liya karte they. Ek chhota sa garage hua karta tha, actually shaayad ussey garage nahi keh sakte. Un dino mere area se dharavi ke liye ek walkway bridge hua karta tha. Usike neeche ek choti si jagah mein hua karti thi toni ki cyle ki dukaan. Aap uss bridge ke paas jaate, aur aapko door se hi dher saari cycle baahar mooh karti dikhaai deti. Toni ke paas saari kism ki cycle hua karti thi. Badi,choti yahan tak ki tricycles bhi.  Sabse zyaada chalti thi who thi BMX cycles. Sunday ko Tv par uski ads bhi bahut baar aati thi. Par meri jo favourite cycle thi who BMX nahi thi. Who ek purani si blue colour ki cycle thi jiska naam bhi mit gaya tha. Mujhe who isliye pasand thi kyonki who bas bilkul meri height ki thi. Jaise mere liye hi banaayi gayi ho. Garmi ki chhuttiyon mein har roz  cycle chalaane ki permission milti thi. Atthani mein aadha ghanta, aur ek rupaiye mein poora ek ghanta. Meri mummy uss mamle mein kaafi dildaar thi. Harroz hamein ek rupaiya milta tha cycle chalaane ke liye. Aur phir kya, pocket mein do khanakti athhani daali aur shaan se chal pade toni ki dukaan ke liye. Lekin kaafi dafa aisa hota tha ki aap toni ke paas pahunche aur bas tabhi hi koi bachcha aapki favouritewaali cycle lekar jaa raha hota tha. Aap ussey rok toh nahi sakte they kyonki is cycle pe uska bhi shaayad utna hi haq tha jitna aapka. Who atthani deta, aur aadhe ghante ke liye cycle uski ho jaati. Shaayad aaj apne mashooq ko kisi aur ki bahon mein sochkar jaisi feeling aati hain, uss samay woh feeling aisi hi kuch hua karti thi. Phir kya, aapke paas toh ek hi ghanta hai, toh aap phir koi bhi doosri cycle uthaate they aur round maarne nikal padte they. Par phir agle din, toni ki dukaan khulne se pehle hi wahan pe pahunch jaate they. Jaisi hi dukaan khuli, bas jhat se apni cycle ko pakad lete they aur ek rupaiya jhat se toni ke haath mein thamaa dete they. Jaane ke waqt who kalwaala bachcha aata tha, aur aap seena phulaakar apni cycle ko kasskar pakde hue uske saamne se gujarte they. Phir chalaane mein jo mazaa aata tha, who shaayad apni khud ki personal cycle chalaane mein bhi na aata hoga…

    Rule yeh tha ki toni ke paas se cycle bhaade par lo, phir apni galli mein jaake chalao taaki mummy ki nazar hardam aap par tiki rahe. Kaafi baar mummy apne rasoikaam mein busy ho jaati thi. Aisa mauka haath mein aaya nahi aur bas cycle lekar un galliyon ki taraf chal diye jahan par aapka jaana allowed nahi tha. Kyon? Kyonki who galliyan dharavi ke nazdeek thi aur wahan choriyan bahut hoti hain. Waise wahan chalte hue darr lagta tha, par jab cycle par they, socha karte they ki aa jaane do chor ko. Aaya toh cycle itni tezz daudaani hai ki who kabhi pakaad hi na paaye.  Iss khayaal mein kuch gazab ka romanch tha. Aur aise palon mein ek gazab si azaadi mehsoos hoti thi.

Aaj shaayad apni gaadi mein bhi main kuch aisi bastiyon se gujarti hoon jahaan choriyaan bahut hoti hain. Par mujhe who azaadi nahi mehsoos hoti. Balki ek darr sa bana rehta hain. Kuch anhoni hone ka darr.  Jab main sochti hoon tab aisi kuchh khaas cheez khayaal mein nahi aati jiske khone par mujhe bahut hi dukh hoga. Phir bhi ek darr bana rehta hai. Shaayad bachpan mein kuch khone ka dard mehsoos nahi kiya tha toh kuch khone ka darr bhi nahi tha… Jo tha, who thi khuli sansein, thandi hawan  aur haathon mein apni favourie bhaade ki cycle…